Наша Радзіма – Беларусь. Тут мы нарадзіліся і жывём, тут жылі нашы продкі, жывуць і працуюць нашы бацькі. У гісторыі нашага народа ёсць падзеі, даты, пра якія мы павінны заўсёды памятаць. 17 верасня ў нашай краіне адзначаецца Дзень народнага адзінства, свята згуртаванасці, непадзельнасці, яднання. На працягу тыдня ў дзіцячай бібліятэцы праходзілі мерапрыемствы, прысвечаныя Дню народнага адзінства. Інтэрактыўная віктарына “Што ты ведаеш пра Беларусь” ставіла мэтай пазнаёміць першакласнікаў з нацыянальнымі сімваламі нашай краіны, беларускім народным адзеннем, прыгажосцю прыроды роднага краю. У ходзе мерапрыемства мы прапанавалі дзецям звярнуць увагу на абрыс нашай краіны на карце Еўропы і вызначыць, лісток якога дрэва ён нагадвае. У завяршэнне дзеці паглядзелі лялечны спектакль “Заяц і Ваверка”.
Для чытачоў сярэдняга школьнага ўзросту быў падрыхтаваны інфармацыйны час “Мы, беларусы, мы – народ такі”, вусны часопіс “Краіна славы партызанскай, краіна міру і даброт”, падчас якіх ўдзельнікі мерапрыемстваў паразважалі што такое адзінства і нацыянальныя сімвалы Беларусі, успомнілі старонкі гісторыі нашай краіны, прынялі ўдзел у краязнаўчых віктарынах. Спадзяёмся, што нашы госці надзейна ўсвядомілі, што якасці беларусаў – згуртаванасць, талерантнасць і ўзаемаразуменне заўсёды павінны заставацца галоўнымі.
На працягу тыдня ўсе наведвальнікі бібліятэкі маглі пазнаёміцца з кнігамі, прадстаўленымі на кніжнай выставе “Мы, беларусы, мы-народ такі”.
